16 июни соли 2013 бар асари боронҳои пуршиддат дар иёлати Уттаракҳанди Ҳиндустон воқеъ дар наздикии кӯҳҳои Ҳимолой чандин ҳодисаи лағжиши замин ба қайд гирифта шуд ва шумори кушташудагон дар ин офат 5 ҳазору 748 нафар эълон шуд. Аз ҷумла, ҳудудан сад нафар зоирони яке аз маъбадҳои ҳиндувон – Кедарнатҳа ба ҳалокат расиданд. Иртибот бо ҳудудан ё бештар аз 10 ҳазор нафар дар ин ҳодисаи мудҳиш қатъ гардид. Барои наҷоти онҳо Ҳинд ноилоҷ қувваҳои мусаллаҳи худро ҷалб кард.
**** **** ****
2 майи соли 2014 баъди боронҳои пуршиддат дар вилояти Бадахшони Афғонистон ду ҳодисаи мудҳиши рониши замин сабт шуд. Деҳоте дар бағали кӯҳ зери як қабати бештар аз даҳметраи лой монд ва бино ба омори баъдан ироашуда ярч наздик ба 300 хонаро пахш кард. Маълумоти дақиқи ҳалокшудагон вуҷуд надорад. Баъзе манбаъҳо шумори фавтидагонро аз 350 то 2 ҳазору 700 нафар эълон карданд. Зиёда аз 4 ҳазор нафар маҷрӯҳ шуданд, аз хонаҳои худ маҳрум гаштанд.
**** **** ****
30 июли соли 2014 ярч шаҳраки Малин дар округи Пуна воқеъ дар иёлати Маҳараштраи Ҳиндро пурра аз байн бурд. 151 нафар ҷон бохтанд. Барои зиндамондагон як деҳаи нав чанд километр дуртар аз маҳалли фоҷеа бунёд карданд.
Моҳи июли соли 2021 бошад дар ҳамин иёлати Ҳинд ярч сабаби марги 136 нафар шуд. Қисмати бештари ҳалокшудагон сокинони наздисоҳилии ноҳияи Раигад ва ноҳияи ғарбии Сатара буданд. 55 нафар бенишон ғайб заданд ва 70 нафар захмӣ гаштанд.
**** **** ****
2 августи соли 2014 дар шимоли Непал дар ноҳияи Синдхупалчок ярче бо дарозии 2 километр шаҳраки Юраро хароб кард ва роҳи дарёи Санкосиро баст. Дар ин ҳодиса 156 нафар ба ҳалокат расиданд. Барои пешгирӣ аз харобии сарбанд Ҳинд сарбозонашро эъзом кард.
**** **** ****
29 октябри соли 2014 дар шаҳараки Косландаи наздикии шаҳри Бадулла, вилояти Уваи Шри-Ланка сел омад. Ҳудудан 150 хона зери лойё лойқа монд ва наздик ба 250 нафар ҷони худро аз даст доданд. Азбаски асноди зарурӣ пурра нобуд шуда буд, омори дақиқи ҳалокшудагон низ дастрас нагардид.
**** **** ****
Шаби 2 октябри соли 2015 дар Гватемала ярч аз 200 хона 125 хонаро дар шаҳраки Камбрай-2 дар мунитсипалитети Санта-Катарина-Пинула зери лой кард. Наҷотдиҳандагон аз зери хоку лой 280 ҷасадро берун оварданд ва наздик ба 70 нафари дигар бенишон ғайб заданд.
**** **** ****
2 апрели соли 2017 дар натиҷаи боронҳои зиёду пуршиддат ярч дар шаҳри Мокоа воқеъ дар ҷанубу ғарби Колумбия (департаменти Путумайо) 329 нафарро ба ҳалокат расонд ва қариб 70 тани дигар бенишон шуданд.
**** **** ****
Рӯзҳои 12-14 июни соли 2017 152 нафар дар натиҷаи боронҳои пуршиддат ва лағжиши замин дар ҷанубу шарқи Бангландеш ҳалок шуданд.
**** **** ****
14 августи соли 2017 дар натиҷаи лағжиши замин дар пойтахти Серра-Леона шаҳри Фритаун ҳаддиақал 312 нафар ҷон бохтанд.
**** **** ****
Дар лағжиши замин дар шаҳри ҷопонии Атами, ки рӯзи 3 июли соли 2021 иттифоқ уфтод, 18 нафар ҷон бохтанд ва 12 нафар бенишон шуданд.
**** **** ****
16 июли соли 2021 ярч дар ноҳияи Касансойи вилояти Намангони Ӯзбекистон сабабгори марги 8 нафар шуд.
**** **** ****
18-уми июли соли 2021 ярч дар шаҳри Мумбаи Ҳинд 25 нафарро кушт. Як поракӯҳи азим баъди боронҳои пуршиддат сарозер шуд ва ба маҳалҳои фақирнишини шаҳр зарар расонд кард.
