Рӯзи шанбе, 31-уми августи соли ҷорӣ кормандони Институти геология, сохтмони ба заминҷунбӣ тобовар ва сейсмологияи АМИТ бори дигар гирди ҳам омаданд, то дар корҳои тозагиву покӣ дар атрофи бинои Институт саҳм бигиранд.
Тобистон батадриҷ ба поён мерасад ва фасли хазонрез аз ҳамин ҳоло аз худ дарак медиҳад. Тирамоҳро фасли заррин аз он номидаанд, ки баргҳои зарҳалӣ аз дарахтон ба зер меафтанд ва лозим меояд пайваста онҳоро руфт.
Бахусус, боди субҳгоҳӣ метавонад ба шиддат баргҳоро ба атроф паҳн кунад ва як манзараи начандон дилраборо дар роҳраву атрофи бино ба вуҷуд орад.
Кормандон баргҳои хазонро руфтанду алафҳои расидаву хушкидаро дарав карданд.
Девори биноро сафед карданд ва бехи ниҳолҳоро нарм сохтанд.
