Донишҷӯёни соли сеюми факултети сохтмон ва иншооти гидромелиоративии Донишгоҳи агарарии Тоҷикистон ба номи Шириншоҳ Шоҳтемур дар лабораторияи зилзилатобоварии бино ва иншооти Институи геология, сохтмони ба заминҷунбӣ тобовар ва сейсмологияи АМИТ бо фаъолиятҳои ин лаборатория аз наздик шинос шуданд.

Дар ҷараёни диду боздид ба донишҷӯён дар бораи таърихи ин лаборатория ва гузаштаву имрӯзи он маълумот дода шуд.

Мутахассисони лаборатория ба донишҷӯён фаҳмонданд, ки лабораторияи зилзилатобоварии бино ва иншоот воҳиди сохтории Институти геология, сохтмони ба заминҷунбӣ тобовар ва сейсмологияи Академияи миллии илмҳои Тоҷикистон буда, дар самти эҷоди лоиҳаҳои инноватсионӣ ва татбиқи технологияҳои инноватсионӣ дар сохтани биноҳо ва иншоот бо назардошти тобооварии онҳо ба зилзила корҳои илмӣ-тадқиқотӣ аннҷом медиҳад.

Ин лаборатория соли 2011 дар заминаи гурӯҳи моделсозии падидаҳо ва таъсироти сейсмикӣ, ки соли 2005 ташкил шуда буд, таъсис дода шудааст.  Ҳадафи лаборатория таҳия ва дар истеҳсолот ҷорӣ намудани лоиҳаҳои нави инноватсионие мебошад, ки ба зилзила тобовар будани бино ва иншоотро таъмин намуда, ба коҳиши хатари сейсмикӣ дар шаҳру навоҳии Ҷумҳурии Тоҷикистон мусоидат кунад. 

Ба донишҷӯён ин нукта фаҳмонда шуд, ки вазифаҳои лаборатория аз:

- ба роҳ мондани тадқиқоти илмӣ (назариявӣ ва амалӣ) дар самти коҳиши хатарҳои сейсмикӣ бо иштироки васеи мутахассисони ҷавон;

- пайваста ташкил ва баргузор намудани мубоҳисаҳои касбии лоиҳаҳои таҳқиқотӣ ва натиҷаҳои онҳо дар шакли семинарҳо ва мизҳои гирд;

- мониторинги тамоюлҳои рушди илми хориҷӣ дар соҳаи ҳифзи сейсмикии бино ва иншоот;

- таблиғ ва татбиқи технологияи инноватсионӣ дар раванди таълиму омӯзиш бар пояи таҳқиқотҳои гузаронидашуда:

- ҳамоҳангсозии корҳои лаборатория бо ҳамаи кафедраҳои асосии Донишгоҳи техникии Тоҷикитсон, сохторҳои лоиҳакашӣ, сохтмонӣ ва тадқиқотии Кумитаи меъморӣ ва сохтмони назди Ҳукумати Ҷумҳурии Тоҷикистон;

- ҳамкорӣ бо марказҳои илмии Русия ва дигар кишварҳои хориҷӣ; иштирок дар конфронсҳои илмӣ, семинарҳо, симпозиумҳое, ки дар кишвар ва берун аз он мегузаранд;

- омода намудани кадрҳои шоиста ва баландихтисоси илмӣ аз тарики аспирантура, докторантура ва PhD иборат мебошад.

Самтҳои асосии тадқиқоти лаборатория роҳандозии пажӯҳишҳои таҷрибавӣ ва назариявии тобоварии сейсмикии биноҳо ва иншооти зеризаминӣ дар моделҳои компютерӣ, гузаронидани озмоишҳое, ки дар натиҷаи онҳо биноҳо ва иншооти мавҷуда ва сохташаванда ва унсурҳои бунёдии онҳо вайрону хароб намешаванд, арзёбии осебпазирии биноҳои мавҷуда, бар пояи таҳқиқоти тачрибавй, таҳияи усулҳои мустаҳкам намудан ва барқарор кардани бино ва иншоотҳое, ки дар вақти зилзила ва дар натиҷаи паст шудани заминҳои таҳкурсй вайрон шудаанд, аз ҷумла, беҳтар сохтани бехатарии сейсмикии биноҳои камошьёна, ки бо маводҳои маҳаллии бинокорй ва хонаҳое, ки аз гил сохта шудаанд ба шумор меравад.

Дар навбати худ донишҷӯён ба таҳқиқотҳое, ки лаборатория роҳандозӣ кардааст, мароқ зоҳир карданд. Ба онҳо дар доираи ин суол посух дода шуд, ки ин шабу рӯз кормандони лаборатория дар самтҳои:

- Равишу шеваҳои таҳлили эҳтимолии хатарҳои сейсмикӣ;

- Тавсеа ва рушди равишҳои ададии усулҳои механикии сохтмон, масъалаҳои назарияи биноҳо ва иншооти ба зилзила тобовар;

- Моделсозии математикии масъалаҳои тамаркузи (консентратсия) шиддат дар иншооти болоизаминӣ ва зеризаминӣ бо дар назар гирифтани гуногунӣ ва ноҳамсонӣ бар асоси усули муодилаҳои марзӣ;

- Моделсозии математикии масъалаҳои якченака, дученака ва сеченакаи механикаи сохтмон бар асоси усулҳои деформатсияи тамаркуз;

- Моделсозии масъалаҳои ҳифозати ларзаӣ (сейсмикӣ) ва изолятсияи сейсмикии бино ва ишоот;

- Равишҳои озмоиши ғайритахриб (вайроннашаванда), ки барои таҳлил ва санҷиши унсурҳои бино ва иншоот истифода мешаванд, таҳқиқот анҷом медиҳанд.

Дар идомаи таҷрибаомӯзӣ роҳбалад онҳоро бо фаъолиятҳои амалии лаборатория, имкониятҳои техникии он ва дастовардҳои пажӯҳишӣ ошно намуд.