24-уми августи соли 2021, соати 08:40 дақиқа дар ҷамоати деҳоти А.Абдулвосиев, деҳаи Навободи шаҳри Ваҳдат ярч  50 метр канали обро пур аз лой кард. Дар ин ҳодиса зиёда аз 200 га заминҳои кишоварзии аҳолии деҳаҳаои Навобод, Чиламазаро, Пирқадамӣ аз оби полезӣ маҳрум шудаанд. Инчунин ба заминҳои корами қисмати поёнии канал лойқа даромада зарар расонд.

 14 сентябри соли 2021 тахминан соати 01:15 дар деҳаи Тундараи ҷамоати деҳоти Баҳори шаҳри Ваҳдат ярч иншооти ёрирасони ду сокини деҳа ва чойхонаи ҷамъиятиро қисман хароб кард. Ҳаҷми ярч тахминан 1440 метри мураббаъ ҳисоб карда шудааст.

Тибқи маълумоти пешакӣ сабаби рониши замин аз меъёр зиёд обёрӣ кардани боғи себ будааст, ки дар қисмати болоии хонаҳои истиқоматӣ ва дар теппа ҷойгир шудааст. Ҷамъ шудани оби зиёд ва қабат ба қабати хоки теппаро фаро гирифтани он сабаби ҷамъшавии обу лой дар дохил шуда, ба лағжиши замин оварда расондааст.  Ин ҳодиса талафоти ҷонӣ надошт. 

17 майи соли 2021 ярч дар ноҳияи Деваштичи вилояти Суғд панҷ нафарро ҳалок кард, ки яке аз онҳо тифли яксола буд.

Ин  тақрибан соати 14:00 – 14:30 дар деҳаи Дархони ҷамоати деҳоти  Исмоили Сомонии ноҳияи Деваштич рух дод.  Соҳиби боғ теппаи паси хонаи худро аз ниҳолҳо сабз кардаву қоидаҳои бехатарӣ ва агрономии обёриро риоя накардааст. Оби зиёд тадриҷан заминро нарм кардаву теппа лағжидааст. Дар натиҷа соҳиби хона ва модари хонадон бо ду фарзандаш, ки яке 11 ва дуюмӣ 10 сол дошт, зери лой монданд.

Ярч ҳамчунин хонаи ҳамсояи онҳоро низ зер кардааст ва зани ҷавони 21-сола ҳамроҳ бо фарзанди ширхори яксолааш зери лой мондаву ҳалок шудаанд. 

Ҳамсояҳо ба зудӣ ҷасадҳоро аз зери лой берун овардаанд.