6 феврали соли 2023 бо фосилаи 9 соат дар қисмати ҷанубу шарқи Туркия замин ду маротиба шадидан такон хӯрд. Маркази заминларзаи аввал бо қувваи 7,8 (± 0,1) балл дар ноҳияи Шаҳидкомил дар Ғозиайнтоб (Туркия) ва маркази такони дуюм бо қувваи 7,5 (± 0,1) балл дар ноҳияи Экинузу дар Қаҳрамонмаръаш  (Туркия) буд. 

Баъди ин ду заминларза боз чандин маротибаи дигар ҷунбиши замин бо қувваи мухталиф ба қайд гирифта шуд. Дар Туркия дар ин заминларза беш аз 50 500 нафар ҷон бохтанд ва дар Сурия аз ҳалокати 8476 нафар гузориш расид. Ва даҳҳо ҳазор нафари дигар дар қаламрави ду кишвар ҷароҳат бардоштанд.

Туркия вазъи фавқулода эълон кард ва 7 рӯз дар мотами қурбониён нишаст. Ин заминларза дар Туркия шадидтарин зилзила баъди заминҷунбии Эрзиндҷон дар соли 1939 буд. Аз рӯи омори ҳалокшудагон ин заминларза баъди зилзилаи соли 1268 Киликия дар ҷойи дуюм буд, дар қаламрави Сурия бошад ҳамсон ба заминларзаи Алеппо дар соли 1822 ба шумор меравад. 

Ин заминларза ғайр аз Туркияву Сурия боз дар Лубнон, Либӣ, Арманистон, Исроил ва Қибрис низ эҳсос шуд.

Баъди ин заминларза калонтарин коргоҳи нафткашии Сурия дар Бониёс аз сабаби тахриби таҷҳизот кори худро қатъ кард. Аз маҳбаси шаҳри Роҷуи Сурия беш аз 20 нафар маҳбусони гурӯҳи террористии “Давлати исломӣ” фирор карданд.  

Дар бартарафсозии паёмадҳои ин заминларза дар қаламрави Туркия бори аввал 50 нафар наҷотдиҳандагони Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон ширкат карданд. Бо онҳо муяссар шуд 73 биноҳои баландошёнаи харобгаштаро аз назар гузаронида, 1 кӯдаки шашмоҳа, 1 кӯдаки сесола ва 1 марди 30 - соларо аз зери вайронаҳо зинда пайдо ва ҷонашонро аз марг наҷот диҳанд.  Инчунин имдодагрони тоҷик аз зери харобаҳо 217 ҷасади шаҳрвандони Туркияро берун оварданд, 41 адад силоҳи оташфишон, маблағҳои зиёди пулӣ ва ашёҳои гаронарзишро пайдо ва ба мақомотҳои дахлдори Ҷумҳурии Туркия супориданд.