Ин таҳқиқот аз ҷониби гурӯҳи донишм андону пажӯҳишгарон бо роҳбарии узви вобастаи АМИТ, доктори илмҳои геология ва минералогия, профессор А. Файзиев анҷом шудааст.
Муайян карда шуд, ки майдони маъдании Якҷилва (Помири ҶанубиШарқӣ) дар қатори дигар майдонҳои дорои маъдани нуқраи Помир - Бачор, Марҷонай, Қародара, Сасик ва ғайра яке аз майдонҳои аз захираи маъдани нуқра бой ба ҳисоб рафта, аз нигоҳи омӯзиши металлогенӣ, минералогӣ, геокимиёвӣ ва назарияи пайдоиши минералу маъдан суст омӯхташуда ба шумор меравад. Ассотсиатсияи минералҳои омӯхташуда гувоҳӣ медиҳанд, ки дар майдони маъдании омӯхташаванда имкониятҳои кашфи минералҳои кашфношудаи нуқраю сурма калон аст.
Бино ба тадқиқоти базалтоидҳои ишқорӣ дар қисми марказии гиреҳи маъдании Зарнисор (Олтинтопкан) нишон доданд, ки синну соли базалтоидҳои ишқорӣ дар ҳамаи найчаҳои таркишӣ («Алтин-I», «Алтин-II», «Кичик») комилан якхелаанд ва андозаи миёнаи синну соли онҳо аз рўйи шкалаи байналхалқӣ ба 169±7 млн. сол баробар аст ва ба юраи миёна ва боло – асрҳои бат ва келловей рост меояд. Синну соли ин найчаҳои таркишии базалтоидҳои ишқорӣ қариб 100 млн сол аз синну соли радиологии ҷинсҳои магматикӣ ҷавонтар мебошад.
Бино ба таҳқиқоти анҷомёфта ташаккул ва ҷойгиршавии конҳои нуқра ва нуқрадор аз маҷмӯи омилҳо вобастагӣ доранд (геотектоникӣ, сохторӣ, литологӣ-петрографӣ, стратиграфӣ, метасоматизминаздимаъданӣ, умқиташаккул, буриши эрозионӣ, минтақабандиимаъдан), вале омилҳои сохторӣ ва литологӣ-петрографӣ дар байни онҳо аҳамияти калон доранд. Таҳлили маводи мавҷуда имкон медиҳад, ки дурнамои ин минтақаҳоро оид ба паҳншавӣ ва ҷойгиршавии маъдани нуқра муайян карда шавад.
Барои сақфи қабатҳои сумсар (палеоген) ва гознау (буриболоӣ) кони нафту гази Маҳрам (ҳавзаиФарғонаи Ғарбӣ) харитаҳои сохторӣ тартиб дода шуданд, ки сохти геологии ин конро ба тарзи нав шарҳ медиҳанд.
Дар рагаҳои пегматитии майдони Шохдара минерали нодири скандийдор – ниобохефтетернит (ScNbO4) ёфта омӯхта шуд, ки ин кашфи дуюми ин минерал дар дунё мебошад.
